Autoritetet italiane akuzojnë palën shqiptare për vonesa në dërgimin e mostrave të ADN-së së biznesmenit Davide Pecorrelli, për t’i krahasuar ato me të vëllait të tij. Mediat e vendit fqinj rendisin tre elementë kyç që karakterizojnë çështjen. Së pari partnerja e tij shqiptare me të cilën Davide kishte një djalë, ia ka besuar çështjen avokatit Giancarlo Viti, i cili përfaqëson atë dhe të miturin si palë të prekura në këtë situatë. Elementi i dytë i referohet ADN-së dhe mosrespektimit të afateve në lidhje me dërgimin e tyre në Itali, si edhe faktit qe mostrat e ADN-së së Pecorellit nuk kanë arritur ende për të bërë krahasimin me ADN-në e vëllait të tij Antonello. Dhe për këtë mediat italiane fajësojnë policinë shqiptare për informacionet nuk vijnë në kohën e duhur. Mediat italiane në një situatë të tillë shtojnë pyetjen se çfarë mund të kishte ndodhur me Daviden në veri të Shqipërisë? Ai kishte mbëritur në Shqipëri, me qëllim studimin e tregut të paisjeve kozmetike, ku edhe pretendonte se do të arrinte një marrëveshje të madhe. Pas mbërritjes në ditët e para të janarit intenerari i tij mësohet se ka qenë Rinas, Vlorë, Shkodër dhe më pas në Pukë, aty ku dhe është gjetur e djegur makina tip “Skoda”, të cilën italiani Pecorelli e kishte marë me qera në aeroport. Brenda mjetit janë gjetur disa eshtra të djegura, ndërsa telefoni dhe ora e biznesmenit ishin të padëmtuara.