Një tjetër aksident i rëndë në minierat e Bulqizës i ka marrë jetën një punëtori. Ngjarja u regjistrua në një nga galeritë private në zonën e Batrës, në Martanesh, ku ka humbur jetën 62-vjeçari Gëzim Muça. Mësohet se minatori ishte duke punuar në frontin e nxjerrjes së kromit, kur një masiv mineral është shembur, duke e zënë poshtë dhe duke i shkaktuar plagë të rënda. Kanë qenë kolegët e tij ata që kanë konstatuar aksidentin dhe kanë njoftuar menjëherë ambulancën dhe Policinë. Pavarësisht mbërritjes së shërbimeve të emergjencës, 62-vjeçari është gjetur pa shenja jete, pasi nuk ka mundur t'u mbijetojë plagëve të marra. Ndërkohë, Policia ka nisur hetimet për zbardhjen e plotë të rrethanave të aksidentit, ndërsa pritet të përcaktohen edhe shkaqet që çuan në shembjen e masivit të kromit. Vdekja e minatorit rikthen edhe një herë në vëmendje sigurinë në galeritë minerare dhe rreziqet me të cilat përballen çdo ditë punonjësit në këtë sektor.