Presidenti ukrainas Volodymyr Zelenski tha se ka në plan të bisedojë me presidentin amerikan Donald Trump, të mërkurën për të dëgjuar më shumë rreth telefonatës së tij me liderin rus Vladimir Putin. “Sot do të kem kontakt me Presidentin Trump”, tha Zelenski në një konferencë për shtyp në Helsinki, bashkë me presidentin finlandez Alexander Stubb. "Ne do të diskutojmë detajet e hapave të ardhshëm me të". Zelenski tha se marrëveshja e Putinit për të ndaluar goditjen e infrastrukturës energjetike ishte "shumë në kundërshtim me realitetin" pas një serie sulmesh me dronë në të gjithë vendin, natën e kaluar. Zelenski tha se një nga çështjet më të vështira në negociatat e ardhshme do të ishte çështja e lëshimeve territoriale. “Për ne, vija e kuqe është njohja e territoreve të okupuara përkohësisht të Ukrainës, si territore ruse, ne nuk do të shkojmë drejt saj” – tha ai.