Rusia ka nisur tashmë një luftë ‘hibride’ përmes presionit ekonomik, sulmeve kibernetike dhe një taktike të re, atë të alarmeve të rreme për bomba. Objektivi i Moskës, sipas amerikanes Wall Street Journal, që citon burime nga Kievi, është ai i dobësimit të Ukrainës dhe mbjelljes së panikut duke shkaktuar pakënaqësi dhe protesta të ngjashme me ato që u panë në lidnje të vendit në 2014-ën, për të justifikuar në këtë mënyrë një ndërhyrje ushtarake të saj. Policia ukrainase, sipas Uoll Strit Xhornal, ka marrë thuajse 1 mijë mesazhe anonime në janar, pjesa më e madhe e të cilëve përmes e-maileve, me alarme të rreme për bombë në rreth 10 mijë pika të ndryshme, nga shkollat e deri tek infrastruktura thelbësore. Agjencitë amerikanë të zbulimit e kanë paralajmëruar që më herët mundësinë që Rusia të jetë duke përdorur inskenime nga më të ndryshmet për të krijuar pretekstin perfekt për nisjen e luftës, që tashmë, duket sikur është më e afërt se kurrë.