Shtetet e Bashkuara të amerikës kanë ndaluar një cisternë nafte pranë brigjeve të Venezuelës në ujëra ndërkombëtare, konfirmoi Sekretarja e Sigurisë Kombëtare të SHBA-së, Kristi Noem, një veprim që vjen vetëm disa ditë pasi Presidenti Donald Trump, njoftoi një "bllokadë" të të gjitha cisternave të naftës të sanksionuara që hyjnë dhe dalin nga Venezuela. Është hera e dytë në javët e fundit që Shtetet e Bashkuara ndalojnë një cisternë pranë Venezuelës mes një grumbullimi të madh ushtarak amerikan në rajon. Noem konfirmoi se Roja Bregdetare ndaloi një cisternë që ishte ankoruar për herë të fundit në Venezuelë. "Shtetet e Bashkuara do të vazhdojnë të ndjekin lëvizjen e paligjshme të naftës së sanksionuar që përdoret për të financuar narkoterrorizmin në rajon," tha ajo në një deklaratë të postuar në mediat sociale. "Ne do t'ju gjejmë dhe do t'ju ndalojmë." Tre zyrtarë amerikanë më herët i thanë Reuters se anija ishte konfiskuar. Trump tha të martën se po urdhëronte "Një bllokadë të plotë për të gjithë cisternat e sanksifikuara të naftës që hyjnë dhe dalin nga Venezuela". Fushata e presionit e Trump ndaj Presidentit të Venezuelës, Nicolas Maduro, ka përfshirë një prani ushtarake të shtuar në rajon dhe dhjetëra sulme ushtarake ndaj anijeve në Oqeanin Paqësor dhe Detin e Karaibeve pranë Venezuelës, të cilat kanë vrarë të paktën 100 persona. Trump ka thënë gjithashtu se sulmet tokësore të SHBA-së në vendin e Amerikës së Jugut do të fillojnë së shpejti. Madoro pretendon se grumbullimi ushtarak i SHBA-së synon rrëzimin e tij dhe marrjen e kontrollit të burimeve të naftës të vendit të OPEC-ut, të cilat janë rezervat më të mëdha të naftës bruto në botë.