Presidenti indonezian, Joko Widodo, premtoi të martën se do të intensifikoheshin përpjekjet e evakuimit dhe do të riparoheshin shtëpitë e dëmtuara pasi vizitoi zonën ku shpërtheu vullkani, në ishullin Java, ku si pasojë u humbën 34 jetë njerëzish. Mali Semeru, 3676 metra i lartë, shpërtheu të shtunën duke ngritur një re hiri në qiell dhe duke lëshuar rrjedha të rrezikshme llave mbi fshatrat poshtë tij. Mijëra njerëz u zhvendosën, 17 mbeten ende të zhdukur sipas agjencisë së menaxhimit të katastrofave në vend. Pasi vizitoi qendrat e evakuimit dhe mbikqyri zonën me helikopter, presidenti tha se përpjekjet e shpëtimit do të intensifikoheshin. Përpjekjet e kërkim shpëtimit vazhduan edhe të martën por janë penguar sidoqoftë nga era e fortë dhe shiu, si edhe nga pajisjet e kufizuara në disa vende. Mali Semeru shpërtheu tre herë të martën. Ekspertët thonë se ka mundësi për rrjedhje të reja gazi të nxehtë, hiri dhe shkëmbinjsh. Semeru është një nga më shumë se 100 vullkanët aktivë në indonezi, vend që ndodhet në një zonë me aktivitet të lartë sizmik të njohur si Unaza e zjarrit në paqësor.