Presidenti serb, Aleksandër Vuçiç, gjatë fjalimit në Asamblenë e Përgjithshme të Kombeve të Bashkuara tha se Kosova është "pjesë e pandashme e Serbisë" dhe “shtylla kryesore e identitetit, kulturës dhe trashëgimisë shpirtërore” të Serbisë. “Për ne, serbët, ajo nuk është thjesht një copë toke, por djep i shpirtit tonë dhe e ekzistencës sonë në këtë tokë”, tha Vuçiç raporton Radio Evropa e Lirë. Ai u ndal dhe tek serbët në veri, ku sipas tij po jetojnë në kushte dramatike. “Atyre po u mohohen të drejtat themelore njerëzore: e drejta për jetë, për lëvizje, për arsim dhe për përkujdesje shëndetësore. Atyre u mohohet qasja në vendin e punës dhe në pronë”, pretendoi udhëheqësi serb që vijon të jetë kundër aksionit të qeverisë së Kosovës për mbylljen e institucioneve serbe në territorin Kosovar. Gjatë fjalimit në Asamblenë e Përgjithshme të OKB-së, Vuçiç bëri thirrje që komuniteti ndërkombëtar të “marrë hapa konkretë dhe të vendosur” për të ndalur, siç tha ai, dhunën në Kosovë. Një paradoks ky që duket se prej kohësh po përdoret nga lideri serb si argument për ndaljen e dialogut mes dy vendeve, ku dhe njëherë ai pohoi se “Serbia beson në dialogun" që ndërmjetësohet nga Bashkimi Evropian.