Një viktimë dhe dy të plagosur, ky është bilanci i një ngjarjeje të rëndë të ndodhur pasditen e kësaj të hëne në Gjykatën e Apelit të Juridiksionit të Përgjithshëm në Tiranë. Gjyqtari Astrit Kalaj humbi jetën, ndërsa mbetën të plagosur Rakip Kurtaj dhe Ervis Kurtaj, babë e bir, palë në procesin gjyqësor. Ajo që duhet të ishte një seancë normale gjyqi ku do të zgjidhej një cështje pronash që prej vitesh kishte ndezur debate në Shkodër, përfundoi në një tragjedi. Elvis Shkëmbi, pjesë e palës tjetër, nxori pistoletën dhe hapi zjarr duke qëlluar në drejtim të gjyqtarit të çështjes Astrit Kalaja dhe pjesëtareve të tjerë që ishte në konflikt, duke shënuar kështu dhe një nga krimet më të rënda të ndodhura në dyert e drejtësisë. Elvis Shkëmbi u prangos menjëherë nga policia që shkoi në vendngjarje pas marrjes së njoftimit, ndërsa u sekuestrua dhe arma e krimit. Mësohet nga burime se ai pranoi krimin duke thënë se po I binin në qafë dhe nuk shfaqi asnjë shenjë pendese. Ndërkohë të plagosurit u dërguan me urgjencë drejt spitalit të Traumës ku po marrin ndihmë mjekësore. Në dyert e gjykatës, mbërritën po ashtu prokuror të SPAK si dhe drejtori I përgjithshëm I policisë, Ilir Proda. Po ashtu po hetohet dhe mënyra se si autori mundi të fusë armën në ambientet e brendshme të gjykatës së Apelit. Vrasja e gjyqtarit Astrit Kalaj ka tronditur të gjithë vendin. Kjo është vrasja e dytë e një gjyqtari në vend, pas Skerdilajd Konomit në Vlorë.