Një anëtar i ushtrisë ruse është vrarë në qytetin ukrainas Çernobaievka pas sulmeve me artileri, tha të shtunën Shtabi i Përgjithshëm i Forcave të Armatosura të Ukrainës përmes një postimi në Facebook. Në njoftim thuhet se gjenerallejtënant Andrei Mordivchev, komandant i qarkut jugor të Forcave të Armatosura ruse ka vdekur. Në njoftimin e Forcave të Armatosura të Ukrainës po ashtu thuhet se vija e frontit të luftës nuk ka ndryshuar ndjeshëm në 24 orët e fundit, por u shtua se trupat ukrainase kanë arritur të shkatërronin disa kolona me personel ushtarak rus në rajonet Mikolaiv dhe Sumi. Po ashtu, Ushtria e Ukrainës ka bërë të ditur se ka mbrojtja e tyre ajrore ka shkatërruar të paktën 12 objektiva ajrore ruse: dy avionë, tre helikopterë, tre dronë dhe katër raketa. Këto pretendime të palës ukrainase sidoqoftë nuk kanë mundur që të verifikohen në mënyrë të pavarur. Zyrtarët ukrainas thonë se i kanë shkaktuar humbje të mëdha trupave ruse, përfshirë edhe të paktën 14 drejtues të lartë të ushtrisë. Një ditë më parë u raportua edhe se një njësi elitë ruse ishte shpartalluar në luftime.