Një gjykatë në qytetin gjerman të Aachenit ka dënuar një burrë me tetë vjet e gjysmë burg për drogim dhe përdhunim të përsëritur ndaj gruas së tij, filmim të akteve dhe më pas postim të tyre në internet. Burri, i identifikuar si Fernando P në përputhje me ligjet gjermane të privatësisë, u shpall fajtor për përdhunim të rënduar, lëndim të rëndë trupor dhe shkelje të privatësisë personale. Gjykata e shpalli 61-vjeçarin, i cili është me origjinë nga Spanja, fajtor për drogimin dhe përdhunimin e gruas së tij në shtëpinë e tyre për një periudhë disavjeçare nga viti 2018 deri në vitin 2024. Një zëdhënëse e gjykatës, Katharina Effert, tha se burri gjithashtu filmoi abuzimin dhe e ndau atë në internet. "Ai ngarkoi video të këtyre akteve në grupet e bisedave dhe platformat e internetit, duke i bërë ato të disponueshme për përdoruesit e tjerë", tha ajo. Pjesa më e madhe e gjyqit u zhvillua me dyer të mbyllura për të mbrojtur identitetin e gruas së tij. Avokatja e saj, Nicole Servaty, u tha gazetarëve se viktima ishte në gjendje të dëshmonte, të shprehte ndjenjat e saj dhe gjithçka që e kishte ndodhur. Ajo tha se vendimi nuk mund të kompensojë atë që ndodhi. "Por mund të ndihmojë pak për t'u përballur me gjërat dhe për t'i përpunuar ato." Vendimi pritet të apelohet për një dënim më të rëndë.