Ekonomia ruse po përballet me vështirësi këtë vit. Krahas inflacionit edhe deficiti buxhetor është në rritje, për shkak të shpenzimeve masive ushtarake dhe po ashtu ka tkurrje të të ardhurave nga nafta dhe gazi natyror. Rritja ekonomike është ngadalësuar ndjeshëm gjithashtu. Por stuhia ekonomike që po shtohet nuk ka gjasa ta sjellë Presidentin Vladimir Putin në tryezën e negociatave së shpejti për t'i dhënë fund luftës në Ukrainë. Analistët thonë se Kremlini mund ta përballojë këtë për shumë vite të tjera me ritmin aktual të luftimeve dhe me sanksionet ekzistuese perëndimore në fuqi. Ekonomistë rusë në mërgim, anti-Putin, besojnë se aftësia e Kremlinit për ta zhvilluar luftën është e papenguar nga asnjë kufizim ekonomik . Sanksionet perëndimore nuk i kanë shkaktuar mjaftueshëm dëme ekonomisë së Rusisë, e cila është e bazuar tek energjia. “Për sa kohë që Rusia nxjerr naftë dhe e shet atë me një çmim mjaft të arsyeshëm, ajo ka para të mjaftueshme për të bërë gjithçka” - tha për CNN Richard Connolly, ekspert i sigurisë ndërkombëtare. Ashtu si ekspertë të tjerë, Connolly tha gjithashtu se inflacioni në Rusinë post-sovjetike ka qenë gjithmonë i lartë, kështu që konsumatorët janë mësuar me të. Fondi Monetar Ndërkombëtar ka parashikuar që inflacioni vjetor në Rusi do të jetë mesatarisht 7.6% këtë vit, nga 9.5% në vitin 2024. Rusia tani po shpenzon gati 40% të buxhetit të saj “për agresion”, tha Sekretari i Përgjithshëm i NATO-s, Mark Rutte , më parë këtë muaj. Shpenzimet më të larta kanë krijuar një klasë të re “fituesish” ekonomikë të kohës së luftës, që janë prodhuesit e armëve. Si rezultat, pabarazia ekonomike në Rusi ka rënë, që do të thotë se Putini përballet me më pak presion nga disa sektorë të shoqërisë.