Një gazetare afgane dhe shoferi i saj u vranë të enjten nga sulmues të paidentifikuar në provincën Nangarhar. Zëdhënësi i provincës, Attaullah Khogyani, konfirmoi për Radion Evropa e Lirë se Malala Maiwand, folëse në Televizionin Enikass, u vra së bashku me shoferin, gjatë rrugës për në punë, në qytetin Xhalalabad. Maiwand kishte punuar për televizionin privat për rreth tetë vjet.Ajo ka qenë edhe aktiviste për mbrojtjen e të drejtave të grave dhe fëmijëve në Afganistan. Sedik Sedikii, zëdhënës i presidentit afgan, Ashraf Ghani, tha se vrasja e Maiwandit “është një sulm tronditës dhe i neveritshëm terrorist”. “Dhuna e pakuptimtë kundër njerëzve tanë duhet të marrë fund”, shkroi ai në Twitter. Përgjegjësinë për sulmin nuk e ka marrë asnjë grup. Si militantët talebanë, ashtu edhe ata të grupit Shteti Islamik janë aktivë në provincën që kufizohet me Pakistanin. Vrasja e Maiwandit vjen vetëm pak javë pasi gazetari i Radios Evropa e Lirë, Mohammad Ilyas Dayee, vdiq në provincën jugore të Helmandit, pas shpërthimit të një bombe të vendosur në makinën e tij.