Të paktën pesë gazetarë, korrespondentë ukrainas ose të huaj, dhe operatorë kanë mbetur të vrarë në frontin e luftës në Ukrainë, në përpjekje për të raportuar dhe dokumentuar krimet e luftës që po trondisin dita ditës territorin ukrainas. Yevhenii Sakun, një operator kamerash për stacionin LIVE të Ukrainës, ishte gazetari i parë i vrarë në luftë. Sakun vdiq më 1 mars kur një stacion televiziv në Kiev, u godit nga bombardimet ruse. Federata Ndërkombëtare dhe Evropiane e Gazetarëve dënoi sulmin, i cili vrau gjithashtu edhe katër persona të tjerë, duke e quajtur atë një krim lufte.. Brent Renaud, një regjisor amerikan që punonte për revistën Time, u vra më 13 mars kur trupat ruse hapën zjarr ndaj një automjeti me të cilin ai po udhëtonte jashtë Kievit. Edëard Felsenthal, kryeredaktori dhe CEO i Time, tha të dielën se gazetari fitues i shumë çmimeve ishte duke punuar në një projekt të Time Studios të fokusuar në krizën globale të refugjatëve. Renaud la pas projekte të vlerësuara të video-gazetarisë dhe filmave dokumentarë, të cilat kanë kapur rekord shikueshmërie në HBO, Vice dhe organizata të tjera të mëdha ndërkombëtare të lajmeve.