Policia në Malajzi shkatërroi me një rul ngjeshës, 1.2 milionë dollarë pajisje për “gjetjen” e Bitcoin. Bllokimi i këtij aktiviteti erdhi pasi 2 milionë dollarë energji elektrike ishte vjedhur pikërisht nga “gërmimi” i kriptomonedhave. Autoritetet malajziane kanë bërë një shtypje të vërtetë të aktivitetit të kriptomonedhave. Pasi konfiskuan 1069 pajisje të përdorura për gërmimin e tyre, ata përdorën një rul shtypës për t’i shkatërruar ato. Një video është publikuar online ku me rulin ngjeshës shkatërrohen pajisje me vlerë 1.26 milionë dollarë. Këto pajisje u konfiskuan në 6 operacione të ndryshme policore, mes muajit shkurt dhe prill. Vende të tjera si Kina kanë zgjedhur opsione të tjera për ndalimin e këtij aktiviteti të paligjshëm, siç është nxjerrja në ankand e pajisjeve të konfiskuara. Në Malajzi, ata që vjedhin energji elektrike rrezikojnë 5 vite burg ose gjoba mbi 20 mijë dollarë.