Erjon Goxhara, autori i plagosjes së 45-vjeçarit Lorenc Kosta në ngjarjen e ndodhur në Komunën e Parisit në Tiranë tre ditë më parë është vetëdorëzuar në polici. 46-vjeçari, efektiv i Policisë së Shtetit u vetëdorëzua këtë të mërkurë në drejtorinë vendore të Policisë së Tiranës së bashku me armën e shërbimit, me të cilën policia thotë se ka kryer plagosjen e 45-vjeçarit Kosta. Ndërkohë, të tjera detaje janë zbardhur nga ngjarja që tronditi banorët e rrugës Tish Daija në Kryeqytet. Pasi derdhi disa plumba në këmbët dhe pjesët intime të Lorenc Kostës, Goxhara i ka thënë atij që të mësojë të mos futet më në familjet e të tjerëve. Shkaku që çoi policin në plagosjen e Kostës, dyshohet se ka qenë tradhtia bashkëshortore. Partnerja e Goxharës punonte juriste në zyrën e Kostës, ndërsa ky i fundit ushtron profesionin e inxhinierit te Enti Rregullator i Energjisë. Vetë bashkëshortja e autorit pranon se kishte lidhje intime me Lorenc Kostën, e madje është shprehur se ajo do të divorcohej nga Erjon Goxhara, duke shtuar se ai e akuzonte atë për tradhti dhe për shpërdorim të buxhetit. Gruaja e Goxharës dhe i plagosuri Lorenc Kosta edhe ky i martuar, kishin disa kohë që kishin krijuar lidhje me njëri tjetrin. Punonjësi i policisë ishte njohur me këtë çështje në muajin korrik, ku kërcëoi me anë të një telefonate Lorenc Kostën. Goxhara akuzohet për kryerjen e veprave penale “Vrasja me paramendim”, mbetur në tentativë dhe “Mbajtja pa leje dhe prodhimi i armëve, armëve shperthyese dhe o municionit”.