Gjykata e Apelit në Catania të Italisë ka dënuar me 15 vite e 5 muaj burg Moisi Habilajn, trafikantin shqiptar të drogës. Gjyqtarët e Apelit të Catanias kanë lënë në fuqi vendimin e parë, duke lënë në fuqi dënimin me 15 vjet, 5 muaj dhe 10 ditë siç ishte vendosur më 19 qershor 2019 nga gjykata e shkallës së parë. Pas këtij vendimi Moisi Habilajt do t’i duhet të kthehet sërish në qeli, pasi nga muaji maj ai kishte dalë nga burgu dhe ishte me ‘arrest shtëpie’. Së bashku me Habilajn gjyq u dënuan edhe shqiptarët Meridian Sula, Nezar Seiti, si dhe 4 italianë. Dy shqiptarët e tjerë Maridiam Sulaj dhe Nezar Seiti, kanë përfituar ulje dënimi nga Apeli. Sulaj u dënua me tetë vjet ndërsa Seiti, që besohet të ishte arkëtari i organizatës dhe u ekstradua në Itali pasi u arrestua në Shqipëri, gjashtë vjet e tetë muaj. Në shkallën e parë Sulaj u dënua 8 vite e 4 muaj burg dhe Seiti 7 vite e 4 muaj burg. Moisi Habilaj është është kushëri i largët i ish-ministrit të Brendshëm Saimir Tahiri, për të cilin u zhvillua një proces në Shqipëri. Prokurorët që hetuan çështjen Tahiri, nuk kanë arritur të identifikojnë dhe provojnë veprime konkrete të kryera me dashje nga ish-ministri Saimir Tahiri, për të ndihmuar grupin kriminal të Moisi Habilajt për trafikimin e lëndëve narkotike Gjykata e Krimeve të Rënda e shpalli fajtor ish-ministrin e Brendshëm, vetëm për akuzën e “Shpërdorimit të detyrës” duke e dënuar me 3 vite shërbim prove dhe ndalim të të drejtës për të ushtruar funksione publike. Tahiri e ka apeluar këtë vendim dhe tashmë çështja po shqyrtohet nga Gjykata e Posaçme të Apelit