Kurrikula shkollore pritet të ndryshojë duke përfshirë edhe inteligjencën artificiale. Në të njëjtën kohë propozohet nxitja e përdorimit të IA në institucionet arsimore për mësimin e personalizuar. Në dokumentin e Ministrisë së arsimit që është në konsultim publik për zhvillimin e arsimit digjital deri në 2030 synohet të përputhet mësimdhënia me standardet e BE-së. “Përdorimi i inteligjencës artificiale në mjediset arsimore do të krijojë mundësi të reja për përshtatjen e përmbajtjes mësimore sipas nevojave, ritmit dhe stilit individual të çdo nxënësi. Me publikimin e ChatGPT nga OpenAI në 2022 , duke qenë i orientuar për përdorim të përgjithshëm dhe falas, adoptimi i tij në arsim është rritur. Mjetet e IA kanë potencial të konsiderueshëm për të pasuruar praktikat arsimore, por ato kërkojnë udhëzime të qarta dhe mbështetje në trajnime për t’u përdorur në mënyrë etike dhe efektive. Ministria e Arsimit dhe Sportit është e angazhuar për të avancuar përdorimin e përgjegjshëm të IA në sistemin arsimor”. Duke vlerësuar sugjerimin e Unescos të ‘konsensusit global për IA dhe arsimin” që mbështet integrimin e inteligjencës artificiale në arsim, planifikohet që brenda një periudhe 5 vjeçare në shkollat shqiptare lënda ekzistuese e TIK-ut të ndërthurë edhe njohuri për IA. Plani i veprimit përcakton gjithashtu nevojën për përgatitjen e të gjithë mësuesve të sistemit parauniversitar, ku do të duhet të ndjekin të detyruar trajnime për pedagogjinë digjitale. Ndërsa parashikohen edhe paketa individuale mbështetëse për arsimtarët. “Nëpërmjet trajnimit të vazhdueshëm të mësuesve, në përputhje me Kornizën Evropiane të Aftësive Digjitale për Edukatorët, çdo mësues do të pajiset me njohuritë dhe aftësitë e nevojshme për të integruar me sukses teknologjinë në mësimdhënie dhe për të udhëhequr procesin e të nxënit në mjedise të ndryshme, fizike dhe digjitale. Ky objektiv përfshin pikërisht trajnimin e detyrueshëm për aftësitë bazë në TIK për të gjithë mësuesit. Gjithashtu do të shoqërohet me rishikime periodike të kompetencave digjitale të mësuesve, në mënyrë që t’u ofrohet mbështetje dhe mundësi mësimore të personalizuara për ata”. Në listën e detyrave, Ministria e Arsimit planifikon edhe blerja e 5,500 laptopëve deri në 2027 për mësuesit e gjimnazeve publike dhe kërkohet që vitin e ri shkollor si pjesë e Programit të Rritjes dhe Reformës së BE-së, qeveria e Shqipërisë të lidhë 95% të shkollave publike me një lidhje interneti me shpejtësi të lartë. Projektvendimi “Për miratimin e Planit të Veprimit të Arsimit Digjital 2025-2030 duke përfshirë standardet për arritjen e kompetencës digjitale”, propozohet nga Ministria e Arsimit dhe Sportit (MAS) si një dokument politik i qeverisë shqiptare, e cila i kushton vëmendje të veçantë zhvillimit të arsimit digjital, si një e drejtë themelore kushtetuese dhe përgjegjësi publike, nëpërmjet të cilës synohet të krijohen, zhvillohen dhe të mbrohen dijet përmes mësimdhënies, kërkimit shkencor, formimit të specialistëve të lartë dhe të shkencëtarëve të rinj, në përputhje me prioritetet e zhvillimit të vendit, duke kontribuar në rritjen e standardeve të demokracisë në vend.