Një agronom që nderohej si hero kombëtar në Kinë, për shpikjen e një lloj orizi hibrid që shpëtoi nga uria miliona njerëz në mbarë botën, vdiq të shtunën në moshën 90 vjecare. Yuan Longping, i njohur si “babai i orizit hibrid”, konsiderohet i pari që kultivoi orizin hibrid me prodhim të lartë, në vitin 1973. Yuan vdiq në një spital në Changsha, kryeqytet i provincës së Hunanit. Sipas burimeve, ai vuante nga një sëmundje e rëndë. Orizi hibrid mund të japë deri 20% më tepër prodhim, se orizi i zakonshëm, dhe pas Kinës u kultivua gjerësisht edhe në shumë vende të botës. Ai ka bërë që Kina të mund të përballojë nevojat e popullsisë më të madhe të botës, plot 1.4 miliardë banorë. Aktualisht, Kina ka 16 milion hektarë tokë bujqësore të mbjella me orizin hibrid, apo 57 % të sipërfaqes totale oriz-prodhuese, që ndihmon për të ushqyer 80 milion njerëz më shumë në vit. Lajmi i vdekjes së agronomit, pati gati një miliardë shikime në vetëm dy orët e para pas njoftimit, me një mori njerëzish që shprehnin ngushëllimet për heroin e tyre, dhe lëvdonin arritjet e tij.