Ministri grek i Mbrojtjes, Nikos Dendias, ishte në Francë për të marrë në dorësim fregatën e parë franceze, nga katër të porositura nga Athina nga Grupi Detar. F601 Kimon, një variant i armatosur rëndë i fregatës franceze të mbrojtjes dhe ndërhyrjes, u dorëzua në një ceremoni të veçantë në portin e Lorientit. Ministri grek, e komentoi këtë moment, si me fregatat, Greqia ka marinën më të fortë në histori. “Greqia po forcon veten për të mbrojtur, penguar, garantuar të Drejtën Ndërkombëtare, konceptin ndërkombëtar që i jep përparësi Ligjit mbi pushtetin dhe jo për të kërcënuar", u shpreh Dendias. Duke komentuar mbi këtë moment të rëndësishëm, kryeministri Kyriakos Mitsotakis e përshkroi dorëzimin e fregatës si "një moment që duhet t'i bëjë të gjithë grekët krenarë". Greqia ra dakord të blinte tre anije – me një opsion për një të katërt – në shtator 2021, si pjesë e një pakete mbrojtëse prej 3 miliardë eurosh. Pas ceremonisë së dorëzimit, F601 Kimon do të lundrojë për në Brest për të marrë sistemet e saj të armëve - duke përfshirë raketat anti-anije Exocet Block III dhe raketat e mbrojtjes ajrore Aster 30 - dhe pritet të mbërrijë në Bazën Detare të Salaminës pranë Athinës në fillim të vitit të ri.