E gjithë vëmendja është drejtuar nga kryeministri i Belgjikës, Bart de Wever, në një takim të liderëve të Bashkimit Evropian në Bruksel, për të vendosur për financimin e Ukrainës përmes aseteve të ngrira ruse. Wever ka qenë shumë i hapur në lidhje me atë që ai i sheh si rreziqe që rrjedhin nga përdorimi i aseteve të ngrira ruse dhe po ashtu mjaft i hapur në lidhje me presionin që ai dhe qeveria e tij kanë përballuar nga aleatët evropianë dhe nga Rusia. Shumica e aseteve të Rusisë në BE me vlerë 210 miliardë euro mbahen nga organizata me seli në Belgjikë, Euroclear, dhe deri më tani Belgjika dhe disa anëtarë të tjerë të bllokut kanë thënë se janë kundër përdorimit të tyre për ta ndihmuar Ukrainën që ta vazhdojë luftën. Reagoi presidenti ukrainas, Volodymyr Zelensky, i cili u tha liderëve evropianë se kërcënimet ligjore nga Rusia “nuk janë aq të frikshme sa kur Rusia është në kufijtë tuaj”. Ai theksoi se nga pikëpamja morale, është e drejtë të përdoren fondet ruse kundër sulmeve të tyre ndaj një vendi sovran. Kancelari gjerman Friedrich Merz gjithashtu kërkoi hapur ngrirjen 210 miliardë eurove e asete ruse për të ndihmuar në përfundimin e luftës në Ukrainë. Gjatë fjalimit të mbajtur në Bundestag mbi zhvillimet e vitit 2025 që po e lëmë pas, Merz pohoi se në nivelin gjeopolitik, trazirat kanë qenë të thella. Marrëdhënia e Gjermanisë me SHBA-në ka ndryshuar rrënjësisht, kujtoi ai.