Bisedime të reja midis të dërguarve rusë dhe amerikanë mbi luftën në Ukrainë janë planifikuar të zhvillohen këtë fundjavë në Miami, Florida, njoftoi të mërkurën një zyrtar i Shtëpisë së Bardhë. Presidenca amerikane nuk zbuloi përbërjen e delegacioneve. Megjithatë, sipas një raporti të publikuar në faqen e internetit Politico, Uashingtoni do të përfaqësohet nga i dërguari special i SHBA-së, Steve Witkoff dhe Jared Kushner, dhëndër dhe këshilltar i Presidentit Donald Trump, dhe Moska nga i dërguari ekonomik i Kremlinit, Kirill Dmitriev. Bisedimet e reja po organizohen pasi Presidenti ukrainas Volodymyr Zelensky foli për “përparim” në përpjekjet për të arritur një kompromis midis Kievit dhe Uashingtonit mbi përmbajtjen e një plani të propozuar Moskës për t’i dhënë fund luftës, pas takimeve të dielën dhe të hënën të zyrtarëve amerikanë, ukrainas dhe evropianë në Berlin. Megjithatë, Zelensky paralajmëroi në të njëjtën kohë se Rusia po përgatitet për një “vit të ri lufte” në 2026.