Gjykata e Fierit la në qeli 25 vjecarin Xhesion Toromeni, autorin e dyshuar të vrasjes së 32 vjecarit Besmir Kumria ngjarje e shënuar pak ditë më parë në fshatin Kryekuq të Divjakës. Gjatë seancës gjyqsore, autori u shpreh se viktima i kishte dhunuar babain tre vite më parë për një kanal uji dhe se arsyeja pse e goditi atë me thikë mbrëmjen e 19 gushtit, ishte për të marrë hak. Besmir Kumria dyshohet se u vra nga Xhesion Toromeni për shkak të një konflikti që kishin familjet e tyre me njëra tjetrën, lidhur me një kanal vaditës në fshatin Kryekuq. Pas krimit, autori u largua nga vendi ngjarjes, por u kap pak orë më pas nga shërbimet e forcave operacionale. Sipas informacioneve, viktima kishte disa vite pa shkuar në Kryekuq, ndërsa punonte në zonën e Himarës gjatë mujave të verës së bashku me vëllain e tij. Pas rreth një jave ai do nisej në Gjermani tek bashkëshortja, e cila punonte infermiere, por fatkeqësisht u vra me thikë nga 25 vjecari. Ndaj Xhesion Toromenit rëndojnë veprat penale “Vrasja me paramendim” dhe “Prodhimi dhe mbajtja pa leje e armëve të ftohta”, teksa prokuroria e Fierit pritet të thellojë hetimet lidhur me këtë ngjarje.