Amerikanët janë shumë pranë fillimit të vaksinimit të sigurtë dhe efektiv kundër COVID-19-s ndërsa shifra totale e infeksioneve në të gjithë vendin llogaritet tashmë në më shumë se 15.3 milionë që prej fillimit të pandemisë. Një grup i posaçëm ekspertësh të jashtëm të Administratës së Ushqimit dhe Barnave (FDA) u mblodh të enjten për të shqyrtuar nëse do të rekomandojnë miratimin për përdorim urgjent të vaksinës së re të prodhuar nga gjigandi farmaceutik amerikan Pfizer në bashkëpunim me kompaninë gjermane BioNTech. Nëse Komisioni Këshillimor i Vaksinave dhe Produkteve Biologjike rekomandon autorizimin, ashtu sikurse pritet, FDA-ja ka të ngjarë të japë pëlqimin e saj përfundimtar të premten ose të shtunën. Qeveria federale do të shpërndajë menjëherë 6.4 milionë doza në të gjithë vendin. Vaksinimi pritet të nisë nga punonjësit e kujdesit shëndetësor të vijës së parë në betejën me COVID-in. Takimi vjen një ditë pasi SHBA regjistroi më shumë se 3 mijë viktima të koronavirusit, një rekord ditor ky që kur pandemia ka filluar. Kompanitë Pfizer dhe BioNTech u vunë në krye të përpjekjeve globale për prodhimin e vaksinës kundër koronavirusit. Britania u bë vendi i parë perëndimor që nisi vaksinimet masive të martën, vetëm disa ditë pasi agjencia rregullatore qeveritare për shëndetin publik miratoi vaksinën e kompanive Pfizer dhe BioNTech. Ndërkohë, kjo vaksinë është miratuar tashmë edhe nga dy vende të tjera, Bahreini dhe Kanadaja.