Presidenti rus, Vladimir Putin duket se ka bërë një llogaritje të gabuar strategjike në pushtimin e Ukrainës duke pasur mungesë taktike në një shkallë të paprecedentë. Një muaj pas nisjes së operacionit të tij special ushtarak, gjeneralët e tij nuk kanë mundur të arrijnë asnjë nga objektivat e tyre. Avancimi në të gjitha frontet ka ngecur dhe asnjë betejë vendimtare nuk është fituar. Madje ka pasur raporte për njësi ruse të rrethuara nga forcat ukrainase pranë Kievit. Rusia ende nuk ka fituar epërsi ajrore dhe nuk ka arritur të marrë asnjë qytet të madh. Shifrat e fundit të viktimave nga Ukraina pohojnë se 12 mijë e 814 ushtarë rusë janë vrarë në aksion dhe të paktën katër prej tyre janë gjeneralë. Gjithashtu rreth 5000 mercenarë mendohet të jenë zhdukur. Një ditë pasi Putin nisi pushtimin e tij, gjenerali Sir James Everard, një ish-oficer kalorësie dhe ish-Zëvendës Komandant Suprem i Aleatëve për Evropën u shpreh se ishte e pritshme që Putin ta përfundonte luftën brenda 21 ditëve; por duket se lufta në Ukrainë është kthyer në rrënimin e Rusisë, e cila po kryen taktika mesjetare, siç u pa me shkatërrimin e Mariupolit.