Ushtria britanike ka dërguar rreth 200 trupa për të mbështetur spitalet e Londrës. Ata duhet të punojnë "së bashku me personelin mjekësor për të mbrojtur vendin nga Covid-19”, tha ministri i Mbrojtjes Ben Ëallace. 32 ushtarë do të ofrojnë gjithashtu ndihmë për shërbimet e shpëtimit. Dislokimi është planifikuar për një periudhë fillestare prej tri javësh. Ëallace tha gjithashtu se rreth 1800 pjesëtarë të ushtrisë tashmë drejtojnë ambulanca, administrojnë vaksinat e koronas dhe mjekojnë pacientët e shtruar në të gjithë vendin. Ata mund të jenë "krenarë për kontributin e tyre në këtë përpjekje të vërtetë kombëtare". Shumë spitale kanë mungesë të personelit për shkak të përhapjes së shpejtë të variantit Omikron të koronavirusit. Kjo ka çuar edhe në sektorin e shëndetësisë në rritje të numrit të sëmundjeve, rasteve të dyshuara dhe fazave të karantinës. Shefi i Shërbimit Shëndetësor Kombëtar (NHS), Mattheë Taylor theksoi se kishte mungesë prej disa mijëra punonjësish në NHS. Mbështetja nga ushtria do të ndihmojë, por duke pasur parasysh humbjen shumë më të madhe të personelit, situata mbetet "shumë e vështirë". Në spitale, operacionet e planifikuara do të shtyhen. Sipas të dhënave të BBC-së, aktualisht në spitale po mjekohen rreth 4000 pacientë me Covid. Në fillim të dhjetorit numri ishte ende 1100. Kryeministri Boris Johnson kundërshton kufizime më të ashpra për shkak të koronavirusit apo edhe një mbyllje të re. Në vend të kësaj, ai njoftoi se do të lehtësonte rregullat e testimit për njerëzit e infektuar asimptomatikë në Angli për të pakësuar pasojat e numrit rekord të infektimeve.