Në fjalën e tij me rastin e Vitit të Ri, kancelari gjerman Olaf Scholz vuri në dukje faktin se kalimi i qetë dhe madje pothuajse miqësor nga qeveria e vjetër federale në të renë, është përshëndetur në të gjithë botën. Kjo sipas tij "është një shenjë e mirë e forcës së shoqërisë sonë." Kancelari tha se "Viti 2021 ishte shumë sfidues për të gjithë ne. Pandemia e koronavirusit me ngarkesat dhe kufizimet e saj të thella vazhdon të na mundojë të gjithëve. Ndërkohë që nuk duhen harruar edhe përmbytjet shkatërrimtare në disa lande të vendit. Sipas Scholz, sado të rënda ishin të dyja këto ngjarje, Gjermania si shoqëri u përball me vendosmëri me këto sfida. "Pas përmbytjes të gjithë së bashku ndihmuam, pastruam dhe filluam rindërtimin. Dhe ne do ta kemi të bëjmë me këtë për një kohë të gjatë", tha Scholz.