Problemet e shkaktuara nga uragani Ida në shtetet jugore amerikane, po kanalizohen tani drejt pandemisë së koronavirusit. Stuhia më e fuqishme e sezonit të uraganeve për këtë vit, ka detyruar me mijëra njerëz të evakuohen nga Luiziana. Dhe të gjithë ata tani janë të pushtuar nga frika dhe ankthi, se pasi humbën shumëcka nga stuhia, rrezikohen edhe nga pandemia. Vetëm 40 për qind e popullatës në Luiziana është vaksinuar plotësisht kundër koronavirusit dhe kjo është një nga shkallët më të ulëta në SHBA, dhe spitalet në shtet janë mbingarkuar edhe një herë tjetër. Vetëm më 2 shtator, departamenti i shëndetit publik në këtë shtet raportoi 2099 raste të reja dhe 74 viktima. Ndaj, shqetësimi për një kombinim mes stuhisë dhe virusit që do të rezultonte në shpërthime të reja të Covid 19, është i logjikshëm e madje i kapërcen edhe kufijtë e zonave të goditura nga uragani. Gjatë vizitës së tij në Luiziana të premten, presidenti amerikan Joe Biden premtoi se asnjë komunitet nuk do të lihet pas në përpjekjet për rimëkëmbje. Qeveria ka siguruar luizianës 100 milionë dollarë ndihmë direkte. Por strategjitë e përdorura për të vënë nën kontroll pandemitë, bien ndesh me nevojën e evakuimeve masive.