Ministri gjerman i mbrojtjes e ka cilësuar si "idiote" kritikën e SHBA-së ndaj sulmeve të thella të Ukrainës në territorin rus. Gjatë një takimi në selinë e NATO-s në Bruksel të martën, Elbridge Colby, zyrtar i lartë i politikave në Pentagon, paralajmëroi mbështetësit perëndimorë të Volodymyr Zelenskyt se sulmet e thella të Kievit ndaj infrastrukturës ruse dhe depove tregtare ishin joefektive dhe rrezikonin të forconin vendosmërinë e Vladimir Putinit. Megjithatë, ministri gjerman i Mbrojtjes, Boris Pistorius, reagoi menjëherë kur u pyet nëse ndante të njëjtin qëndrim me Colbyn. Ai u tha gazetarëve në Bruksel se të kritikosh sulme të tilla në Rusi, që synojnë shkatërrimin e objektivave strategjikë ushtarakë apo atyre që përdoren për qëllime ushtarake, është "diçka mjaft idiote". "Në vend që të kritikojmë këtë, duhet të flasim dhe të kritikojmë sulmet terroriste që ndodhin çdo ditë e çdo natë ndaj infrastrukturës së energjisë, ujit dhe ngrohjes në Ukrainë. Kjo është një formë terrorizmi," shtoi Pistorius. Ministri britanik i Mbrojtjes, Ëes Streeting, mbajti të njëjtin qëndrim, duke thënë se ato sulme "kanë ndihmuar në dobësimin e makinerisë luftarake të presidentit rus Vladimir Putin, duke fituar kohë dhe duke shpëtuar jetë". Ministri ukrainas i Mbrojtjes, Yevhenii Khmara, gjithashtu deklaroi se sulmet e Ukrainës ishin përgjigje ndaj një sërë sulmesh ruse që nga tetori, duke përmendur veçanërisht goditjen ndaj urës së Krimesë, të ndërtuar nga Rusia. "Duam që Federata Ruse të marrë një sinjal të qartë: për çdo sulm që ndërmerr kundër territorit tonë, ne do të përgjigjemi me një forcë dy ose tre herë më të madhe. Dhe ne kemi të drejtë të mbrohemi," tha ai.