Krerët e agjencive amerikane dhe ruse të spiunazhit kanë folur me telefon dhe kanë rënë dakord të mbajnë kontakte të rregullta për të ulur temperaturën në marrëdhëniet SHBA-Rusi, thanë agjencitë e lajmeve të mërkurën. Në kontaktin e parë të tillë, në disa vite, shefi i CIA-s John Ratcliffe dhe kreu i agjencisë së jashtme të inteligjencës ruse SVR Sergei Naryshkin, folën në telefon të martën, tha agjencia shtetërore ruse e lajmeve TASS. Ata "ranë dakord për kontakte të rregullta" midis agjencive të tyre "për të kontribuar në stabilitetin dhe sigurinë ndërkombëtare, si dhe në uljen e konfrontimit në marrëdhëniet mes Moskës dhe Uashingtonit". Biseda telefonike ishte kontakti i parë i këtij lloji që kur Presidenti i SHBA Donald Trump mori detyrën duke u zotuar që t’i japë fund konfliktit tre-vjeçar në Ukrainë. Biseda u zhvillua në të njëjtën ditë kur Ukraina mbështeti një propozim të SHBA-së për një armëpushim 30-ditor dhe ra dakord për negociata të menjëhershme me Rusinë, pas bisedimeve të gjata në Arabinë Saudite.