Ukraina ka kryer një sulm masiv me dronë në Moskë dhe rajonin rreth saj, duke vrarë të paktën një person dhe duke dëmtuar ndërtesa banimi dhe infrastrukturë, teksa diplomatët nga Uashingtoni dhe Kievi përgatiten të takohen në Arabinë Saudite. Sipas Andrei Vorobyovit, guvernatorit të rajonit të Moskës, tre persona janë plagosur në sulmet që ndodhën në orët e para të 11 marsit. Për viktimat është raportuar për qytezën Vidnoje dhe fshatin Jam, afër qytezës Domodedovo. Ministria ruse e Mbrojtjes ka thënë se 337 dronë të lëshuar nga Ukraina janë rrëzuar. Ende nuk dihet saktë se sa dronë janë përfshirë në këtë sulm, më të madhin në territorin rus në javët e fundit. Ky sulm ka ndodhur teksa zyrtarë të lartë amerikanë dhe ukrainas po përgatiten që të takohen në Arabinë Saudite për të diskutuar se si t’i jepet fund luftës. Në ditët e fundit, Rusia i ka shtuar sulmet në infrastrukturën ukrainase dhe shënjestra civile, ndërsa diplomacia rreth luftës është intensifikuar. Në disa fotografi dhe video të paverifikuara nga Moska dhe rrethinat e saj, është parë momenti i sulmeve me dronë në ndërtesat e banimit.