Ukraina ka paralizuar "Google-in rus" përmes një vale masive sulmesh me dronë ndaj qendrave të të dhënave, duke shkaktuar zjarre të mëdha dhe duke detyruar ndërprerjen e shërbimeve. Qendrat në pronësi të gjigantit teknologjik Yandex u përfshinë nga flakët gjatë natës, duke lënë një numër të madh civilësh pa shërbime bankare, aplikacione dhe chatbot-e me inteligjencë artificiale. Ky ishte sulmi i tretë i Kievit ndaj qendrave të të dhënave brenda po kaq ditësh. Alisa, asistenti virtual i Yandex dhe i përdorur çdo ditë nga miliona rusë, u fik si pasojë e këtij sulmi të fuqishëm. Shërbimet e taksive, faqet e internetit dhe shërbime të tjera kyçe u paralizuan nga këto goditje të befasishme. Kjo ndodhi pasi Yandex, një element kyç për zhvillimin e inteligjencës artificiale të Putinit dhe i njohur si "Google-i rus", njoftoi se qendra e tij e të dhënave në rajonin e Kalugës ishte goditur nga dronët ukrainas. Një ditë më parë, një sulm i Kievit kishte çuar në mbylljen e qendrës së të dhënave të Yandex në Sasovo, ku ndodhen dy nga tre superkompjuterët që përdoren për zhvillimin e modelit të inteligjencës artificiale të kompanisë. Ukraina ndërkohë u përmbajt nga goditja e rafinerive të naftës gjatë natës së së shtunës, në sfondin e një përplasjeje në përshkallëzim e sipër midis Donald Trump dhe Volodymyr Zelensky-t. Ndërkohë, sulmet ukrainase me dronë mbi rusi, shkaktuan kaos në të gjithë vendin duke bërë që qindra fluturime të vonoheshin ose anuloheshin në aeroportin e kryeqytetit.