Finalizohet me sukses operacioni policor i koduar "Ndalesa", për goditjen e veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit. Sipas njoftimit zyrtar të Policisë, një person u arrestua dhe dy të tjerë u shpallën në kërkim, pasi strehuan 28 klandestinë me qëllim trafikimin për në vendet e Bashkimit Europian. Në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, specialistët e antikrimit finalizuan operacionin policor të koduar "Ndalesa", në përfundim të të cilit u arrestua në flagrancë shtetasi me inicialet Z. M., 52 vjeç, banues në Shkodër. Gjithashtu u shpallën në kërkim dhe po punohet për kapjen e një shtetasi nga Vlora dhe një tjetri nga Patosi, të cilët në bashkëpunim me njëri-tjterin trafikon klandestinë. Këta shtetas në bashkëpunim me njëri tjetrin,në fshatin Portëz, në ambientet e një magazine kishin strehuar 28 klandestinë me qëllim trafikimin e tyre për në vendet e Bashkimit Europian.