Ministri i Jashtëm i Turqisë, Mevlut Cavusoglu ka sinjalizuar të dielën se Ukraina dhe Rusia janë pranë arritjes së një marrëveshjeje për çështje “kritike” duke shtuar se ai shpresonte për një armëpushi. Ministri i Jashtëm ukrainas, Dmytro Kuleba, dhe ai rus, Sergei Lavrov, janë takuar në Antalia të Turqisë gjatë kësaj jave por, diskutimet nuk kanë dhënë ende ndonjë rezultat konkret. Cavusoglu, i cili kishte qenë i pranishëm në bisedimet mes kryediplomatëve rusë dhe ukrainas, tha për të përditshme turke, Hurriyet se ka pasur “afrim të pozicioneve të të dyja palëve për tema të rëndësishme, për tema kritike”.