Kartelet famëkeqe të drogës në Meksikë duket se i janë rikthyer disa taktikave më mizore të tyre, pasi nëntë trupa gjysmë të zhveshur dhe të torturuar u gjetën të varur në një urë në një autostradë në shtetin meksikan Zakatekas. Autoritetet meksikane thanë se një trup i dhjetë u gjet në tokë, e me sa duket kishte rënë para se zyrtarët të mbërrinin. Një hetim ka nisur dhe zyrtarët po fajësojnë krimin e organizuar. Të gjitha viktimat janë meshkuj dhe trupat e tyre janë transferuar tani në shërbimin e mjekësisë ligjore për të përcaktuar shkakun e vdekjes dhe për të siguruar më shumë të dhëna për identifikimin e tyre – thanë zyrtarët. Autoritetet lokale dënuan aktin mizor dhe dislokuan forcat në zonë për të gjetur autorët. Më 23 nëntor, tre trupa të tjerë u gjetën në dy lokalitete të ndryshme në Zakatekas dhe media meksikane raportoi edhe për tetë trupa të tjerë të varur në pemë, me të njëjtat karakteristika. Një valë e paprecedenttë dhune ka pushtuar rrugët e Zakatekas, ku sipas ekspertëve të sigurisë, katër kartele droge po luftojnë me njëri tjetrin për të kontrolluar territoret. Bëhet fjalë për kartelin e gjeneratës së re Jalisco, kartelin sinaloa, los Zetas dhe kartelin e gjirit, bashkë me bandat lokale. Zakatekas lidh qendrën dhe perëndimin e Meksikës me kufirin amerikan, një territor kyc ky për trajektoret e trafikut të drogës.