Trupat ruse që kanë mbajtur nën kontroll impiantin bërthamor në Cernobil janë larguar dhe lajmi është konfirmuar edhe nga stafi i tij. Sipas kompanisë shtetërore bërthamore të Ukrainës, Energoatom, stafi në impiant tha se aktualisht nuk ka të huaj atje. Më herët, u tha se disa forca ruse ishin nisur drejt kufirit bjellorus duke lënë një grup të vogël pas. Njoftimi duket se konfirmon raportimet e zyrtarëve amerikanë të mbrojtjes. Trupat ruse e morën nën kontroll Cernobilin në fillim të pushtimit të Ukrainës, më 24 shkurt. Energoatom akuzoi po ashtu ushtarët rusë se kishin rrëmbyer anëtarë të rojës kombëtare ukrainase, që mbaheshin rob që nga fillimi i luftës. Kompania ia atribuoi informacionin punonjësve në impiant por nuk dha shifra. Ajo konfirmoi edhe raportet se trupat ruse kishin hapur llogore në pjesën më të madhe të zonës së ndaluar të cernobilit, duke marrë doza domethënëse rrezatimi. Ka madje edhe raporte se disa trupa kanë marrë trajtim në Bjellorusi. Agjencia e lajmeve Reuters citon punonjësit në impiant që thonë se disa ushtarë rusë as nuk e kishin idenë se ishin në një zonë me rrezatim.