Ndokush mund të kishte menduar se pas shtëpisë së bardhë, Donald Trump do të vendosej në Mar-a-Lago duke u shqetësuar vetëm për shkopin e tij të golfit. Por, nuk ndodh kështu. Ish-presidenti u takua të enjten me udhëheqësin e pakicës republikane në dhomën e Përfaqësuesve, Kevin McCarthy, me qëllim që të ndihmojë partinë për të marrë përsëri kontrollin e dhomës, në zgjedhjet e mesit të mandatit në 2022. Takimi, vjen tre javë pasi ligjvënësi i Kalifornisë e zemëroi Trump, duke thënë se ish-presidenti mbante përgjegjësi për trazirat e 6 janarit në Capitol. Takimi u zhvillua në klubin Mar-a-Lago të ish-presidentit në Palm Beach të Floridës, ku Trump banon që pas largimit nga Shtëpia e Bardhë më 20 janar. Trump kishte shprehur privatisht zemërim ndaj republikanit McCarthy tek këshilltarët e tij pas deklaratave të ligjvënësit se ish-presidenti ishte përgjegjës për trazirat në Kapitol ku humbën jetën pesë vetë, tha një burim që kishte dijeni me këtë zhvillim. Më vonë, McCarthy u tërhoq, duke thënë se nuk besonte që trazirat të ishin provokuar nga ish-presidenti. Ish-Presidenti Trump përballet me impeachmentin në Senat muajin e ardhshëm, pas akuzës së ngritur kundër tij nga Dhoma e Përfaqësuesve më 13 janar për nxitje rebelimi. Dhoma e bazon akuzën tek fjalimi që Trump mbajti përpara mbështetësve para se ata të sulmonin Capitolin. Këshilltarët thonë se kohët e fundit Trump ka folur për formimin e një alternative ndaj Partisë Republikane, Partisë Patriotike, gjë që nëse realizohet mund të kishte efekte katastrofike për republikanët në zgjedhjet e ardhshme. Por pas takimit me McCarthyn, duket se kjo ide është lënë mënjanë, të paktën përkohësisht.