New York Times, duke cituar një zyrtar anonim të administratës amerikane, ka raportuar se presidenti Donald Trump do të diskutojë pezullimin e mundshëm ose anulimin e plotë të ndihmës ushtarake për Ukrainën, përfshirë dërgimin e armëve të financuara nga administrata e Joe Biden. Sipas The Neë York Times, një përfaqësues nga administrata e Trump tha se presidenti do të takohet me këshilltarët e tij të lartë të sigurisë kombëtare gjatë ditës, duke përfshirë Sekretarin e Shtetit Marco Rubio dhe Sekretarin e Mbrojtjes Pete Hegseth, për të shqyrtuar dhe ndoshta për të ndërmarrë veprime mbi disa opsione politike në lidhje me Ukrainën. Zyrtari tha se midis këtyre opsioneve është pezullimi ose anulimi i ndihmës ushtarake të SHBA-së për Ukrainën, duke përfshirë dërgesat më të fundit të municioneve dhe pajisjeve të autorizuara dhe të paguara gjatë administratës së Biden. Gjatë fundjavës së kaluar, pati raporte se administrata e Presidentit të SHBA Donald Trump po shqyrton ndalimin e të gjitha dërgesave aktuale të ndihmave ushtarake në Ukrainë në përgjigje të komenteve të Presidentit ukrainas Volodymyr Zelenski në Zyrën Ovale të premten, dhe mosfleksibilitetit të tij në procesin e paqes. Presidenti ukrainas Volodymyr Zelenskyy u largua nga Shtëpia e Bardhë para kohe të premten pas një përplasjeje me Donald Trump dhe zëvendëspresidentin JD Vance. Pas kësaj përplasjeje, Trump tha se Zelenski nuk kishte treguar respekt për SHBA-në dhe se "nuk ishte gati për paqe".