Republika Çeke po kërkon mbështetjen e BE-së për të mbajtur të hapur Radion Evropa e Lirë pasi administrata Trump shkurtoi fondet për transmetuesin global. Ministri i Jashtëm Jan Lipavsky tha se Radio Evropa e Lirë, me qendër në Pragë, "është një nga burimet e pakta të besueshme të informacionit në diktatura si Irani, Bjellorusia dhe Afganistani". Në Evropën Lindore, media e financuar nga qeveria amerikane arriti miliona dëgjues gjatë Luftës së Ftohtë, duke ndihmuar në përhapjen e vlerave demokratike ndërkohë që autoritetet komuniste kontrollonin fort mediat lokale. Elon Musk, i ngarkuar me uljen e kostove nën drejtimin e Donald Trump, e kritikoi Radion Evropa e Lirë duke e konsideruar si një grusht "njerëzish të çmendur, të majtë radikalë, që flasin me veten e tyre, duke djegur 1 miliard dollarë në vit nga paratë e taksapaguesve amerikanë". Por presidenti dhe CEO i Radios Evropa e Lirë, Stephen Capus, tha se heqja e financimit "do të ishte një dhuratë masive për armiqtë e Amerikës". "Ajatollahët iranianë, udhëheqësit komunistë kinezë dhe autokratët në Moskë dhe Minsk do të festonin vdekjen e Radios Evropa e Lirë pas 75 vjetësh," shtoi ai.