Presidenti amerikan, Donald Trump, përballë kritikave të ashpra nga zyrtarë në Ukrainë, Evropë dhe madje edhe nga radhët e Partisë së tij Republikane, mbrojti vendimin për të lejuar eksportet e naftës nga Rusia. Ai po ashtu këmbënguli se një ndërprerje sulmesh ndaj objekteve energjetike mes Kievit dhe Moskës është në fuqi, pavarësisht se asnjëra palë nuk e ka konfirmuar këtë. Duke folur me gazetarët në oborrin e Shtëpisë së Bardhë, Trump tha se armëpushimi po zbatohej, edhe pse zyrtarët ukrainas raportuan për sulme të tjera ruse. I pyetur nëse të dyja palët ishin pajtuar për armëpushimin, Trump tha: “U pajtuan. E dini pse? Sepse unë thashë: ‘Ju pajtoheni’ – prandaj. U pajtuan sepse unë thashë se ishin pajtuar, dhe kjo çështje duhet të zgjidhet”. I pyetur për raportimet mbi shkeljet ruse të marrëveshjes, Trump tha se “nuk ishte i sigurt për këtë”, duke shtuar se presidenti ukrainas, Volodymyr Zelensky, dhe homologu i tij rus, Vladimir Putin, “duhet të takohen dhe t’i japin fund asaj lufte të pakuptimtë”. Trump njoftoi në rrjetet sociale më 11 tetor se të dyja palët ishin pajtuar për një armëpushim energjetik që do të hynte në fuqi menjëherë. Moska ende nuk e ka konfirmuar njoftimin, ndërsa Zelensky tha se propozimi ishte i papritur për të. Edhe në të kaluarën Trump ka deklaruar se palët ishin pajtuar t’i ndalnin sulmet ndaj objekteve energjetike. Këtë e bëri edhe më 14 shtator, por Putin vazhdoi sulmet, duke shuar çdo shpresë për një armëpushim të qëndrueshëm. Ndërkaq, Zelenski ka thënë se Ukraina është e gatshme t’i ndalë sulmet ndaj rafinerive ruse, nëse Moska pranon të ndalë sulmet ndaj sistemit energjetik ukrainas.