Presidenti i SHBA-së, Donald Trump, tha të mërkurën se tarifat mbi produktet e Bashkimit Evropian do të jenë rreth 25 për qind. Ndërsa la të kuptohet se duke nisur nga muaji prill do të hyjnë në fuqi taksat mbi produktet e Kanadasë dhe Meksikës. Në fjalën e mbajtur në mbledhjen e parë t kambinetit të tij, Trump e përshkroi Bashkimin Europian si një përpjekje për të dëmtuar Shtetet e Bashkuara. “Shikoni, le të jemi të sinqertë, Bashkimi Evropian u formua për t’i dëmtuar Shtetet e Bashkuara”, tha Trump, pavarësisht se vetë Uashingtoni e mbështeti krijimin e BE. I pyetur nëse kishte marrë një vendim mbi nivelin e tarifave për bllokun, Trump shtoi: “Do ta shpallim shumë shpejt dhe përgjithësisht do të jetë 25%”. Ai tha se kjo do të ndikojë në shumë produkte, përfshirë makinat, duke shtuar se BE-ja “na ka shfrytëzuar vërtet shumë”. Që nga marrja e detyrës në janar, Trump ka shpallur dhe ka pezulluar tarifa të përgjithshme ndaj fqinjëve të SHBA-së, Kanadasë dhe Meksikës, për shkak të emigracionit të paligjshëm dhe kontrabandës së fentanilit.