Një bashkëbisedim i frytshëm dhe tepër pozitiv është cilësuar telefonata mes presidentit të Shteteve të Bashkuara të Amerikës, Donald Trump dhe homologut të tij rus, Vladimir Putin e cila kishte në fokus nisjen e një procesi për ndalimin e luftës në Ukrainë që ka hyrë në vitin e saj të tretë. Sekretarja e Shtypit e Shtëpisë së Bardhë, Karoline Leavitt, përmes një postimi në X, thotë se të dy liderët folën për nevojën për paqe dhe një armëpushim në luftën në Ukrainë. Sakaq mediat amerikane që citojnë burime brenda Shtëpisë së Bardhë shkruajnë se liderët ranë dakord për disa çështje që i hapin rrugë në të ardhmen vendosjes së paqes mes dy vendeve. Një nga marrëveshjet e kësaj telefonate, që është e dyta mes Putin dhe Trump që kur ky i fundit mori detyrën, ishte ajo e ndalimit të sulmeve për një periudhë 30 ditore ndaj objekteve energjetike. Pikë kjo që u pranua nga kreu i kremlinit, i cili raportohet të ketë dhënë dhe një urdhër të menjëhershëm për zbatimin e tij.