Një tren rus mallrash doli nga shinat dhe u përfshi nga flakët mëngjesin e të hënës pasi një mjet shpërthyes hodhi në erë trasenë vetëm 60 km larg nga kufiri me Ukrainën. Treni, raportohet se mbante naftë dhe materiale ndërtimi dhe u vu në shënjestër në rajonin Bryansk të Rusisë. Guvernatori lokal, Aleksander Bogomaz tha se nuk kishte të lënduar si pasojë e shpërthimit. Videot e postuara në mediat sociale tregonin disa vagonë të shkatërruar të trenit, në flakë, pas shpërthimit, me tymin gri që ngrihej në qiell. Kompania ruse e hekurudhave, tha se incidenti kishte ndodhur në orën 10.17 minuta të mëngjesit sipas orës së Moskës. Ajo tha edhe se lokomotiva dhe shtatë vagonë mallrash kishin dalë nga shinat. Autoritetet ruse thonë se rajoni, që kufizohet me ukrainën dhe bjellorusinë, ka parë sulme të shpeshta nga grupet ukraniase të sabotazhit që kur lufta nisi shkurtin e vitit të kaluar. Ndërkohë që në një tjetër incident të ngjashëm, pranë shën pjetërburgut, zyrtarët thanë se një linjë energjie ishte hedhur në erë gjatë natës dhe një mjet shpërthyes ishte gjetur pranë një tjetër linje. Guvernatori rajonal postoi fotot e linjave të shkatërruara në llogarinë e tij në telegram mëngjesin e të hënës. Ai tha se shërbimi federal i sigurisë, FSB, po punonte në vendngjarje ndërsa nuk dihet se kush është përgjegjës për incidentin.