Tre avionë të kompanisë amerikane Flexport Inc, të mbushur me patate, janë gati të nisen për të shpëtuar McDonald’s në Japoni nga mungesa e patateve të skuqura e shkaktuar nga kriza në zinxhirin e furnizimeve në botë për shkak të covidit. Jo vetëm kaq; porti i Vankuverit, nga ku nisen anijet drejt azisë, është goditur nga shira dhe përmbytje në mes të dhjetorit dhe të gjitha ngarkesat janë bllokuar. Ditët e shkuara, mungesa e lëndës së parë kishte bërë që të gjithë fast food-et në qytet të racionalizonin patatet e skuqura dhe të shërbenin vetëm porcione të vogla. Imazhet që qarkullojnë në mediat sociale, tregonin radhët e gjata jashtë restoranteve të McDonald’s në Tokjo, për të marrë porcionet e fundit mesatare dhe të mëdha të patateve, më 21 dhjetor. Mungesa e patateve nuk ka prekur në fakt vetëm Japoninë. Në Nju Jork, restoranti ikonik i hamburgerave J.G.Melon, javën e kaluar tha në një postim në instagram se do të bllokonte shitjet e patateve të skuqura për shkak të problemeve me zinxhirin e furnizimit.