I penduari i drejtësisë Nuredin Dumani ka dhënë detaje të tjera të rëndësishmë për ‘Inside Story’, nga saga e vrasjeve dhe tradhtive të njëpasnjëshme në radhët e grupeve kriminale. Në rrugëtimin e tij kriminal, Nuredin Dumani, ndonëse bashkëpunonte ngushtë me Erjon Alibejn, shërbeu dhe për vëllezërit Petrit dhe Agron Qoli. Përmes aplikacionit SKY ECC Dumani kishte hyrë në kontakt me Kel Kamamin. Bisedat mes tyre shkuan përtej bashkëpunimit, ata filluan të thurnin intriga për të tradhtuar njerëzit e tyre më të afërt. Sipas planit, Dumani do të dorëzonte “Krymin”, emër me të cilin njihej Alibej, ndërsa Kamami do të “shiste” të njohurin si “Moma”, pra Talon. “Nuk do ndaloj duke i vrarë të gjithë shokët e Talos, e di që je dhe ti shoku Talos, po me ty e di që ke.... duke i bërë kështu si ta them moral, që ti ke burrni edhe ma jep Talon po të duash.. Më tha: “Ti më tha vrit ‘Krymin’ unë do të jap Talo Çelën edhe 2 milion euro”. I thashë jo, -ti më jep 1 milion e gjysmë euro, fillimisht më jep Talo Çelën, lekët mi jep pasi të vras ‘Krymin’. Po inskenonim një lojë me Erjonin, që ta bënim të bindur.”