Shoqata e të Drejtave të Pacientëve në Kosovë (PRAK) reagoi pas zhvillimeve të fundit politike në vend, duke e cilësuar të “pakuptueshme dhe të pafalshme prishjen e koalicionit në një kohë të tillë, duke i lënë qytetarët në mëshirën e COVID-19 dhe “heronjtë nëpër instikame”. Përmes një deklarate për shtyp, kjo shoqatë u shpreh se i ka ndjekur me shqetësim të madh lajmet se koalicioni qeverisës po shkon drejtë shkatërrimit, e kjo pikërisht atëherë kur prej tij pritej që të ishte më i bashkuar se kurrë. “Në kohën kur COVID-19 është shpallur pandemi globale nga OBSH, e kur ky virus po merr jetë të shumta njerëzish në shumë shtete, madje edhe në shtete të fuqishme, partnerët e koalicionit qeverisës kanë komoditetin të merren me politikë. Duke e ditur se Kosova ka një shëndetësi nën nivel dhe shëndeti publik është i kërcënuar seriozisht, kjo që po ndodh mund të quhet ‘thikë pas shpine’ për qytetarët”, thuhet në deklaratë.