Dy orë pas tërmetit të fuqishëm në Kroaci, toka është shkundur fort edhe në Verona të Italisë. Lëkundje të magnitudës 4,4 u regjistruan në këtë zonë të vendit fqinj. Fillimisht ishte thënë se ato mbërrinin në 4.8. goditjet e tërmetit u ndjenë edhe në një pjesë të veriut të Italisë, deri në Milano. Sipas Institutit Italian të gjeofizikës dhe vullkanologjisë, epiqendra e tërmetit ishte në Salizzole të Veronës, në një thellësi prej 9 kilometrash. Kjo zonë nuk është shumë larg rajonit të goditur rëndë prej tërmetit të vitit 2012 në Emilia Romagna. Majin e atij viti, dy tërmete goditën Italinë Veriore duke shkaktuar 27 vdekje dhe dëme të mëdha materiale. Edhe pse për momentin situata nuk paraqitet problematike, Trenitalia e pezulloi qarkullimin e trenave si masë paraprake, duke sqaruar se do të verifikohen fillimisht dëmtimet që mund të ketë pësuar linja hekurudhore. Me dhjetëra telefonata kanë mbërritur në numrat e emergjencës, megjithatë deri tani nuk ka të dhëna për dëme serioze.