Një ngjarje e rëndë është regjistruar në Fier, ku djali ka tentuar të djegë prindërit e tij brenda banesës. Ngjarja është shënuar në mbrëmjen e së mërkurës në lagjen "15 Tetori". Nga hetimet rezultoi se djali i shtetasve të moshuar, shtetasi me iniciale A. S., 42 vjeç, i ka vënë zjarrin banesës ku jetonte bashkë me prindërit, ka mbyllur dyert, në mënyrë që ata të mos dilnin nga banesa dhe më pas është larguar. Shërbimet e plicisë dhe zjarrfikëses kanë mundur nxjerrjen nga banesa, 2 të moshuarit, në gjendje të mirë shëndetësore, teksa kanë bërë të mundur edhe fikjen e zjarrit. Nga ana tjetër dyshohet se ky shtetas ka ushtruar më parë dhunë ndaj prindërve të tij. Pas kësaj është arrestuar autori i cili është shoqëruar në polici. Mbi të rëndojnë veprat penale Vrasja për shkak të marrëdhënieve familjare, mbetur në tentativë, dhuna në familje dhe shkatërrimi i pronës me zjarr.