Policia e Lezhës ende nuk ka një të arrestuar të dyshuar për vrasjen e efektivit të Forcave të Ndërhyrjes së Shpejtë, Xhulio Prela, vrasje e ndodhur të shtunën në fshatin Gajush. Burime zyrtare të policisë lokale bëjnë të ditur se janë marrë në pyetje 12 persona për të ndihmuar në zbardhjen e vrasjes, por pa arritur dot të ketë një pistë të qartë. Sipas grupit hetimor, 12 personat janë kontakte telefonike të asaj dite, me shpresën se mund të ketë mes tyre të dhëna që do ndikojnë në zbardhjen e krimit të rëndë të të riut që vazhdonte studimet në Akademi, për të marrë gradën e nënkomisarit të Policisë. Jo vetëm ata që kanë biseduar në telefon me të riun, por edhe ata me të cilët ai ka pirë kafe janë marrë në pyetje, pa mundur të lënë hapësira dyshimi. Ndërkohë, në pyetje janë marrë edhe familjarë të tij, të cilët kanë rrëfyer lëvizjet e tij para atentatit, që i mori jetën dhe që pista e vetme e hetimeve deri tani lidhet me detyrën e tij si pjesë e policisë së shtetit.