Ambasadori i BE-së në Shqipëri Luigi Soreca ka publikuar në “Twitter” deklaratën e 20 eurodeputetëve të grupimeve të ndryshme politike, që u bënë thirrje palëve të gjejnë një zgjidhje për hapjen e bisedimeve me Shqipërinë dhe Maqedoninë e Veriut para fundit të vitit. “Deklaratë e rëndësishme e përbashkët nga përfaqësuesit e grupeve politike në Këshillin e Evropës mbi negociatat e pranimit me Shqipërinë dhe Maqedoninë e Veriut”, shkruan Soreca. Në deklaratë ata paralajmërojnë se mos hapja e bisedimeve me dy vendet po vë në rrezik besueshmërinë e BE-së në Ballkanin Perëndimor. Eurodeputetët deklarojnë se Shqipëria e meriton të ecë përpara në rrugën e saj drejt anëtarësimit, duke theksuar përpjekjet për reformat, në veçanti për atë në drejtësi, si dhe për vlerësimin pozitiv të Komisionit. Ndërkaq, ata vënë në dukje se Shqipëria të bëjë më shumë përpjekje në disa fusha të tjera, në mënyrë që të përmbushë kushtet e vendosura nga Këshilli Evropian. Po ashtu ata i kanë bërë thirrje Bullgarisë të gjej një kompromis me Maqedoninë e Veriut për çështjet dypalëshe, në mënyrë që të mos vonohet procesi i anëtarësimit.