Postera gjigantë në muret e Teheranit, që tallin presidentin amerikan Donald Trump dhe shfaqin dronë amerikanë nën çizmen e një ushtari iranian, ofrojnë një kronikë të luftës së Iranit me Shtetet e Bashkuara dhe Izraelin. AFP ka siguruar një mundësi të rrallë për të ndjekur nga afër një ekip që krijon këto postera me mesazhe anti-amerikane që vendosen në pika të spikatura në Teheran, ku ato shihen çdo ditë nga turma të mëdha kalimtarësh, përfshirë sheshin e famshëm Valiasr të qytetit. "Khaneh-ye Tarrahan" (Shtëpia e Dizajnerëve) krijoi një imazh gjigant ku buzët e Trumpit duken të qepura dhe goja e tij e mbyllur me maskë, me ngushticën e Hormuzit të vendosur aty, shoqëruar nga mbishkrimi: "Në pikën e thyerjes". "Kur shfaqen lajme të reja, ekipi mobilizohet: gjenerohen ide, dizajnerët grafikë marrin udhëzimet dhe ne bashkëpunojmë," thotë Mostafa Kafaei, 32 vjeç, i cili drejton studion. Studioja vepron nën ombrellën e një prej konglomerateve më të mëdha shtetërore të medias në vend. Posterat financohen nga qeveria dhe përdoren për të përcjellë mesazhet e saj tek një audiencë e gjerë. Një poster nga një studio tjetër shfaq Trumpin të bllokuar brenda një kutie magjistari, duke mbajtur në duar një Coca-Cola dhe një hamburger, me mbishkrimin: "Mjafton një pulitje sysh dhe zhdukesh!" Posteri i referohet një incidenti të ndodhur në korrik në Turqi, ku Trump u transferua fshehurazi nga avioni presidencial "Air Force One" në një avion tjetër përmes një kamioncine shërbimi ushqimesh, për shkak të një kërcënimi sigurie. Një tjetër tabelë gjigante e vendosur së fundmi në Teheran tregon një ushtar iranian që shkel një dron nënujor amerikan, duke ilustruar një "kapje" të fundit në ngushticën e Hormuzit nga Garda Revolucionare e Iranit dhe duke u mburrur se "biznesi po ecën mirë". Një reklamë tjetër shfaq një luftëtar mitik që qëndron në mes të detit të trazuar ndërsa anijet luftarake amerikane digjen, shoqëruar me mesazhin: "Ushtria e Satanit do të mbytet në Gjirin Persik".